so jetzt hani weder mou zit zum do öbis ineschribe. eigentlich hätte mer abgmacht zum go karaoke senge i üsem stramm pub aber es het soo gscheffet höt dases mi aschesse het woni ändli weder troche be gsi vom hei cho weder i scheff use z goh.
höt beni schön verschrocke woni id schueu be. erschtens mou hani weder paar interessanti bekanntschafte met locals gmacht. die si bes jetzt emmer abstruus gsi:D has langsam ufgä normali australier z fende…
uf jede fau beni am morge a strand….es esch de erscht tag sit paar wuche gsi wos net scheffet, und de strand esch eifach nömme gsi. es het 3 meter strand fo geschter uf höt eifach wäg gschpüeut. jetzt müese si luege wöus ergendwie wöschmeschene grossi föuse chönnti im wasser glöst ha chas si dass me för die nöchschte 9 mönet kei chance werd ha zum go bade….
und de het sech de manly daily das schondblatt no beklagt, dass de d lüt nöm uf manly chöme wöu si jo de nöm chöi go bade…fendi eher chli komisch wöu eg be jetzt ou scho es zitli do und de strand eshc bes jetzt emmer gschperrt gsi wäg de gfähliche strömige und d toureschte si gliich emmer cho! vorauem die huere blöde chinese und japaner woni jedes mou am mettag chönnt verhoue wenn si dene blööööde möve z frässe gäbe. i erem land hätte si die fiicher scho lang gässe wöu si e huere plog si und mer ufs badtuech schisse, aber do düe si se no fuetere…do bechomi wörm weni so öbis ghöre!
letscht wucheändi simer am donnschtig id sharkbar wie emmer. esch super gsi. mer chöi jetzt langsam d lieder wo d band emmer spöut oswändig und mer wösse ou i welere reihefoug dass si d lieder spele wöus emmer die gliche si;) de bruno esch de plötzlich usegheit worde wöu si gseit hei: unfortunately you look drunk. maybe you’re not but you look like.
schiinbar gets do sones gsetzt dass wenn der öbis passiert bim hei go nach em pub chasch du s pub derför verantwortlich mache…dönt nach ere amerikanische erfendig, berächtigt aber do d barkeeper zum useschmess fo ergendwelche lüt i ergendwelchem zuestand.
am samschtig beni z obe usem bus usgschtege und de esch mer grad eini fo üsne lehrer entgäge z torkle cho. hani de chli domm agluegt und im gliiche momänt faut mer fo hende eine ome haus. eg dräie mi om und es esch mi lehrer haacke decht.mini einewäg scho bsoffene lehrer si de met mer is pub cho und hei erscht rächt afo suufe. de einti wo scho nöm het chöne stoh woni usem bus cho be, de het plötzlich sini schüeler (net -inne) afo abkösse und eg ha emmer angscht gha daser jetztde grad umkippt. osserdem hets för me no gratis surflessions fomene köllner gä, ganz föu bier, e cooli band, aues lüt for schueu, es bsoffnis liebesgeständnis, feini süessi ham cheese croissans, e fo mer verhendereti schleglete zwösche emene australien und emene schwizer, e angscht um me ghane bruno wöu de australier ergendwie net fo sim trip esch abecho, e sunneufgang am strand met em bruno und em mättu und e franzos woni emmer vergesse wiener heisst, e bruno wo wedermou ir öffentlichkeit am bode schloft (dasmou im sand), e bus wo grad uf dee why fahrt am morge am haubi 9ni, e marina wo im strahlenschte sunneschiin no de bärg uflouft am morge am 9ni, e huustöre wo scho offe esch gsi dasisi net emou me ha müese ufchnorze, und e churze nap bes am eis.
de hätti nämli met de julia und de zita för uf sydney abgmacht. aber ebe. schlofe esch ou ab und zue wechtig. derför beni de spöter met aune andere is gröschte i max kino uf der wäut. de korbi de bayer esch öbrigens ou no cho. er chonnt fo de schueu in sydney säuber und mer hei ne im sufcamp kenne glehrt. rächt e coole.
mer si emu de is kino go beowulf luege. nei net de föum wo d marina vorgschlage het, nei es het de föum vom crazy swiss french müese si. ha no nie sone grusige primitive hässliche föum gseh. hätt jo scho schess gha wenn d monschter net in 3d uf eim zue cho wäre, und wär ou am liebschte weder use aber da eg 20 stotz för de gschpass wo absolut kei gschpass esch gsi zaut ha hani de mini ohrestöpsu uspackt und de pulli öbere chopf gleit und die nöchschte 2 stund no bez döset.
genau uf d schlossmusig beni de wach worde und mer si am harbor öbis go ässe. spöter hätte mer ine disco wele aber paar fo üse jungs si underdressed gsi das heisst mer si net inecho. de simer haut eifach ine normali bar gange und de zita ere gaschtbrüeder esch ou no cho. er esch australier aber e normale typ das heisst eg zöue ehn net zu de „normale“ australier.
eg be de met ehm und de zita hei und zwar zerscht ad wynyard ufe bus go warte. döt hei mer ergenwie d ufmerksamkeit fo paarne hobos uf üs zoge, und das wederom het no me d ufmerksamkeit uf üs glänkt, sodass mer plötzlich umkreist fo öbbe 10 penners si gsi. esch zwar no loschtig gsi aber es het ou ganz abstrusi gschtaute derbi gha und gschtonke hei si zum teil abgöttlich. de joel- de net rechtig australier het sech 100 mou gfrogt was das söu und das sig em jetzt i sire läbtig no nie passiert dass aui penners met eim wei plöiderle. im bus eshc es de witer gange, wöu döt hets näme e zuedrogeti partygang gha und die hei emmer i eire lutstärkli lieder gsunge. esch ausi lüter gsi aus im metro aube. eini fo dene het de agfange fo aune lüt im bus met sech föteli z mache. wo si bi üs aglanget esch het si üs gfrogt öb mer dütsch chönne und öb mer ere chli chönnte wörter öbersetze. hei mer de gmacht:D jedes mou wenn si es wort gseit becho het het sis döre ganz bus gschroue zu erer partygang z henderscht i dem lange bus und si hei de weder zroggschroue was si üs us nöchschts söu froge.
wie ou emmer…me hätts söue meterläbe es esch so schräg gsi dases schwär esch in wort z fasse. eg hare de no mini kamera gä und gfrogt öb si fo üs nomou cha es foti mache und de het si mini kamera gschnappet und esch nomou e runi go fötele im bus. super föteli het das gä;) de joel het d wäut nöm begreffe nach dere busfahrt obwou er do scho sis läbe lang wohnt und sogar eg ha i mine paar wuche do scho mehreri ähndlichi sache erläbt:) im bus lehrt me ebe för s läbe:D
jo de räscht fo mire wuche esch eigentlich normau gsi. emmer nach de schueu no ei zwöi bier go nä und denn hei go choche, ässe, abwäsche, husi mache, is bett go. hei üsi ruhige täg izoge.
aber ab morn werds weder asträngend. zerscht sharkbar, denn am fritig gschluuchet id schueu, am obe gschniglet id opere, nachhär met de partyfamily und em joel go feschte in sydney. am samschtig is steyne, am sunntig de ganz tag go wandere id blue mountains. eg hoffe eifach dases de net so scheffet wie die letschte paar täg. schösch esch de felecht fo de mountains gliich föu öbrig wie for manly beach:P
so eg go jetzt mou is bettli go pfuuse
adie wohl metenand
bes zum nächschte mou weni net versoffe im räge be bes denn!
Mae im Internet 